በተለያዩ ጊዜያት ሕዝቡን ተጠቃሚና ተደራሽ ለማድረግ በርካታ ሥራዎች ተከናውነዋል። በዚህ አግባብ በግብርና፣ በጤና፣ በትምህርት ዘርፎች የሚከናወኑ ተግባራት በዲጂታል ሥርዓት ካልተደገፉ ስኬታማ የመሆን ዕድላቸው ዝቅተኛ ነው።

ይህንን አገልግሎት በማሳደግ ህብረተሰቡን ተጠቃሚ ለማድረግ የመልካም አስተዳደር ችግሮችን፣ በየተቋማቱ አገልግሎት ለማግኘት የሚገጥሙ እንግልቶችን እና ምልልሶችን ማስቀረት ይገባል፤ ለዚህም የፋይዳ ብሔራዊ መታወቂያ ሥርዓት መሠረታዊ ሚና ይጫወታል።

እንደ ሀገር ወደ ዲጂታል ዓለም ለመግባት አራት አስቻይ ነጥቦች ላይ መስራት ይገባል፤ እነሱም ኃይል (መብራት)፣ ዳታ/ኮሙኒኬሽን፣ ዲጂታል ክፍያ ሥርዓት እና በሀገሪቱ እየተተገበረ ያለው የፋይዳ ዲጂታል መታወቂያ ናቸው።

ሀገር ካላት ሀብት ዋናው ሕዝብ ነው። በመሆኑም እንደ ሀገር ያለውን ሀብት መመዝገብና ማወቅ አገልግሎት ለመስጠት ያስፈልጋል። የፋይዳ መታወቂያ አንድ ሰው አንድ መሆኑን የሚያረጋግጥ ሥርዓት በመሆኑ ጥቅሙ እጅግ የጎላ ነው።

የጂዲፒ (GDP) እንደ ሀገር ማግኘትን የሚያስችል ሥርዓት ነው።
የፋይዳ መታወቂያ ማንነትና መታወቂያ አዋጅ ቁጥር 1284/2015 ዋና ዋና ገጽታዎቹን በተመለከተ በገጹ እንደተሰፈረው፣ ዘመናዊ የመታወቂያ ሥርዓት በአንድ ሀገር ውስጥ ተግባራዊ ሲደረግ መሠረታዊ ተብለው የሚጠሩ በርካታ ጠቀሜታዎች ይኖሩታል።

ከእነዚህ ጠቀሜታዎች መካከል ሀገራዊ ልማትን በአግባቡ ለማቀድ፣ ምጣኔ ሀብታዊ ሽግግር ለመፍጠር፣ መልካም አስተዳደርን ለማስፈን፣ የሀብት ብክነትን ለመቀነስ፣ ወንጀልን ለመከላከል፣ ፖሊሲዎች ሲቀረጹና የልማት ሥራዎች ሲከናወኑ ድግግሞሽን ለመቅረፍ እና አካታችነትን ለማጎልበት የሚረዳ መሆኑ ተረጋግጧል።

በኢትዮጵያም በዘመናዊ ቴክኖሎጂ የበለፀገ፣ ዘርፍ ተሻጋሪ እና መሠረታዊ የዲጂታል መታወቂያ ሥርዓት መዘርጋት አስፈላጊ መሆኑ ታምኖበት የብሔራዊ መታወቂያ ፕሮጀክት ጽሕፈት ቤት ተቋቁሞ ለአለፉት ሁለት ዓመታት በግንባታና በሙከራ ሂደት ላይ ቆይቷል።

በዚህ ሂደት ውስጥ ከተለያዩ የአገልግሎት ዘርፎች ጋር ለማስተሳሰር የሙከራ ትግበራ ሥራዎች ተከናውነው፣ አሁን ነዋሪዎችን መመዝገብና የዲጂታል መታወቂያ ባለቤት ማድረግ መቻሉን መረጃው ያመለክታል።

ምስጢራዊነቱ

የፋይዳ መታወቂያ ተጠቃሚ የሆኑ አንዳንድ ሰዎች መታወቂያ ካርዱን ለማግኘት ከጊዜና ከእንግልት አንፃር ቀላል ቢሆንም፣ ሲታተም (ኮፒ ሲደረግ) የጀርባው ምስጢር ይገለጣልን? የሚል ስጋት ያነሳሉ።

ይህ ምን ያህል እውነት ነው? ብለን አቶ ኦሊናን ጠይቀናቸው ነበር። አቶ ኦሊና በምላሻቸው ሁለት ቁጥሮች (የፋይዳ 12 እና 16 ዲጂት) እንደሚሰጡ ገልጸው፣ “ተለዋጭ ቁጥር” የሚባለው 16 ዲጂት ያለው ቁጥር መሆኑን ተናግረዋል።

ይህንን ቁጥር ሰዎች አገልግሎት ሲፈልጉ እንዲያጋሩ ይመከራል ብለዋል። የፋይዳ 12 ዲጂት ቁጥሩን ቢያጋሩም ምንም ዓይነት ችግር እንደማይፈጠር አረጋግጠዋል። ለዚህም ተገቢ የደህንነት ጥበቃ አሠራር መኖሩን መረጃዎች ያመለክታሉ።

መታወቂያው በምን መንገድ መያዝ ይገባል?

ምዝገባ ከተካሄደ በኋላ መታወቂያ ይሰጣል፤ ሥርዓቱ ዲጂታል ነው። በአዋጁ እንደተገለፀውም መታወቂያው ራሱ ቁጥሩ ነው።

የፕላስቲክ መታወቂያ ካርድ ማግኘት ከፈለጉ ግን፣ ጊዜያዊ ስምምነት ከኢትዮጵያ ቴሌኮም እና ከፖስታ ቤት ጋር ተፈጽሞ ስለሆነ፣ ከቅርንጫፎቻቸው በመሄድ አገልግሎቱን ማግኘት ይቻላል።