ውድ አንባቢያን፣ የበጎ ፍቃደኝነት አገልግሎት መግለጫው ብዙ ቢሆንም ዛሬ የክረምት በጎ ፍቃደኝነት አገልግሎትን በተመለከተ ትንሽ ነገር ማለት ወደድኩ፡፡ የክረምት ወቅት ለአብዛኛው የአገራችን ተማሪዎች የእረፍት ጊዜ ነው፡፡ ግማሹ ዘመድ በመጠየቅ፣ ግማሹ ደግሞ በትምህርት ተጨናንቆ የነበረውን አዕምሮ ዘና ለማድረግ በጉጉት የሚጠብቀው ወቅት ነው፡፡

ለአንዳንድ የአገራችን ወጣቶች ደግሞ የክረምት ወቅት ለማህበረሰቡ ከፍተኛ ዋጋ ያለውን ተግባር ለመፈፀም በበጎ ስራ ላይ በመሰማራት ሲታትሩ የሚስተዋልበት ነው፡፡

በርካታ ወጣቶች የክረምት ጊዜያቸውን የበጎ ፍቃደኝነት አገልግሎት በሚሰጡ ተቋማትና አደረጃጀቶች አማካኝነት ጊዜያቸውን ለሌሎች ሲሰጡና ወገኖቻቸውን በሚጠቅም ተግባር ላይ ሲያውሉ በዚያው ልክ ደግሞ በሀገራቸው ዕድገት ላይ ገንቢ አስተዋፅኦ ሲያደርጉ ማየት አሁን አሁን እየተለመደ መጥቷል፡፡

በዘንድሮ የክረምት ጊዜያትም በተለያዩ አካባቢዎች የሚገኙ ወጣቶች በበጎ ስራ ላይ ተጠምደው ይገኛሉ፡፡ የችግኝ ተከላ በማካሄድ፣ የደም ልገሳ ንቅናቄ በማዘጋጀትና ራሳቸውም ደም በመለገስ፣ ሌሎችንም ደም እንዲለግሱ በመቀስቀስ የወገናቸውን ህይወት ማዳን እንደሚቻል አሳይተው አኩሪ ተግባር በመፈፀም ላይ ይገኛሉ፡፡

በከተማችን ዓለም ገበያም የደካሞችን ቤት በመገንባትና በማደስ፣ የትራፊክ ደንብ ማስከበር አገልግሎት፣ በችግኝ ተከላ፣ በማጠናከሪያ ትምህርት መስጠት እንዲሁም ህሙማንን በመንከባከብ በበጎ ተግባር ላይ የተሰማሩ ወጣቶች በርካታ ናቸው፡፡

አሁን አሁን ደግሞ ሀገራችን የቀየሰችውን የአረንጓዴ ልማት ስትራቴጂ ተከትሎ፣ ክረምት ሲመጣ አብዛኛው ወጣትና በርካታ የህብረተሰባችን ክፍሎች ተረባርበው የሚፈፅሙት የችግኝ ተከላ ተግባር የማይረሳ ባህል እየሆነ መጥቷል፡፡

ሁሉም ከአቅራቢያቸው በመንግስት ከተከለሉ ቦታዎች ላይ በንቅናቄ መልኩ ችግኝ በመትከል የኢትዮጵያን ብሩህ ተስፋ ሲያለመልሙ ይስተዋላል፡፡

የአየር ንብረት ለውጥ ጉዳይ ዛሬም መነጋገሪያ ሆኖ እንደቀጠለ ነው፡፡ ያደጉ ሀገራት አሁን ለደረሱበት ብልፅግና ያበቃቸው የእድገት ሂደት በከባቢ አየር ላይ ያደረሰው ጉዳት በተለይም በእድገት ወደኋላ ያሉ ሀገራትን ተጎጂ አድርጓል።

ይህንን በሰው ልጆች ላይ የተደቀነ አስከፊ አደጋ ለመታገል የተለያዩ ሀገራትና ህዝቦች የመፍትሄ እርምጃ ለመውሰድ በትጋት እየተነሱ ናቸው።

ሀገራችን እ.አ.አ. በ2011 የአየር ንብረት ለውጥን ለመከላከል የሚያስችላት ስትራቴጂ ቀይሳ ለተግባራዊነቱ በንቃት መረባረብ ከጀመረች ጊዜ አንስቶ ተጨባጭ ለውጦችን ማስመዝገብ ተችላለች። ኢትዮጵያ አፍሪካውያንን በመወከል በጥልቅ እውቀት ላይ የተመሰረተ ድምፃቸውን በዓለም መድረኮች ላይ ከፍ አድርገው አሰምተዋል፤ በተለይም የበለፀጉ አገራት በፈፀሙት የካርቦን ልቀት ያልጠፉት ታዳጊ አገራት ሊገጡ አይገባም፤ እንዲሁም ካሳ ነው የሚገባቸው በማለት ተከራክረዋል።

በአገራችንም የአረንጓዴ ኢኮኖሚ ስትራቴጂን በመተግበር የራሳችንን የቤት ስራ መስራት ይገባናል በሚል በተደረገው እንቅስቃሴ ባለፉት ዓመታት ከጫፍ እስከ ጫፍ ህዝባችንን በማነቃነቅ ተጨባጭ ስኬቶች ማስመዝገብ ተችላል። የተመናመኑ ደኖች ወደ ቦታቸው ተመልሰዋል፤ የደን ሽፋናችንም እየተሻሻለ መምጣት ችሏል።

የኃይል አማራጮቻችን ከብክለት ነፃ ከሆኑ እንደ ውሃ፣ ንፋስ፣ የፀሃይ ብርሃንና እንፋሎት ከመሳሰሉት ምንጮች መሆኑ ሲታይ ደግሞ ሀገራችን በአጀንዳው ላይ ያላት ቁርጠኝነት የሰው ልጆችን በመታደግ በኩል ምን ያህል ግንባር ቀደም ሚናዋን እየተወጣች እንዳለች ለመረዳት አያዳግትም።

ኢትዮጵያ በዓለም ላይ በፍጥነት እያደጉ ካሉ አገራት መካከል አንዷ መሆኗ ይታወቃል። ይህንን ቀጣይነት ባለው መንገድ ለማስቀጠል ደግሞ ተግዳሮቶቿን ከስር ከስር መፍታት ግድ ይላል። በአሁኑ ወቅት የሀገራችን ኢኮኖሚ የጀርባ አጥንት ግብርና ነውና፣ ይህም እስከ ተወሰነ ጊዜ ድረስ መቀጠሉ ስለማይቀር የአየር ንብረት ለውጥና መዛዘ ደግሞ አንዱና ዋነኛው የእድገታችን ማነቆና ስጋት ነው።

የግብርና ልማት ስራችን ባሰብነው ልክ የእድገታችን ምንጭ ሆኖ እንዲቀጥል ካስፈለገ የመሬት መሸርሸርን በመከላከልና የደን ልማታችንን በማፋጠን የአየር ንብረት ለውጡን ግንባር ተጠቂ እንዳንሆን መስራት ያስፈልጋል።

ለዚህም ነው የአረንጓዴ ኢኮኖሚ ልማት ከእድገታችን ጋር በቀጥታ ስለሚያያዝ በቁርጠኝነት መረባረብ አለብን የምንለው። የክረምት ወቅት የችግኝ ተከላ መርሃ ግብር የአረንጓዴ ልማት ስትራቴጂያችንን በተሟላ መልኩ ለማስቀጠል አይነተኛ ሚና አለው።

በአገራችን የተለያዩ አካባቢዎች በጎ ፍቃደኛ ወጣቶች የጠቅላይ ሚኒስትር አቢይ አህመድ (ዶ/ር) ዘመን ተሻጋሪ አስተሳሰብን ለማስቀጠልና በእርሳቸው ግንባር ቀደም ተሳትፎ የተቀረፀውን ለአረንጓዴ ልማት የማይበገር ኢኮኖሚ የመገንባት ግብ ለማሳካት እየታተሩ ይገኛሉ።

የበጎ ፍቃድ አገልግሎት መስጠት በሀገራዊ የፀረ ድህነት ትግል ላይ የማይፋቅ የራስን አሻራ ማኖር ነውና፣ በዋጋ የማይተመን የመንፈስ እርካታንም ያጎናፅፋል። የበጎ ፍቃድ አገልግሎት ከዚህ በተሻለ መልኩ መጎልበትና ባህል ሊሆን የሚገባ መልካም ተግባር ለማድረግ ደግሞ ወጣቱ አሁን የጀመራቸውን መልካም ተግባራት ይዞ ለበለጠ ውጤትና ተጠቃሚነት መቀጠል ይገባዋል። ይህ መልዕክታችን ነው።